| Երեխաների այցելությունը «Ապագան բաց է» ՀԿ գրասենյակ
|
Մանկատան մի հետաքրքիր պարապմունքի մասին
|
2008թ.-ի ապրիլի 25-ին մի խումբ երեխաներ այցելեցին «Ապագան բաց է» կրթական ՀԿ գրասենյակ` ավելի մանրամասն ծանոթանալու կամավորների աշխատանքներին և ռուսերենի պարապմունքի համար նախատեսված 'The Pursuit of Happiness' - Will Smith (ռուսերեն լեզվով) ֆիլմի դիտմանը: - /ֆիլմի առանցքային գաղափարն էր` ինչ է նշանակում լինել աղքատ, սակայն դրանով հանդերձ կարողանալ բարձրանալ սոցիալական աստիճաններով վեր, եթե առկա է ցանկություն ու ներքին մղում և այդ առումով ոչ մի ջանք չի խնայվում/:
Երեխաները մեծ հետաքրքրությամբ հարցեր էին տալիս կամավորների աշխատանքի մասին, որից հետո անցանք ֆիլմի դիտմանը և քննարկմանը: Նրանք կլանված դիտում էին ֆիլմը, կադր առ կադր որոշ նմանություններ էին գտնում իրենց կյանքում` ֆիլմի միջոցով ստանալով որոշ հարցերի պատասխաններ`թե ինչպես կարող է մարդը դժվար, անօթևան վիճակի մեջ էլ անգամ հասնել մեծ բարձունքների:
Ռուսերենի պարապմունքի վերջում` լարված կինոդիտումից հետո, կազմակերպության կամավորները պատրաստել էին նրանց համար փոքրիկ հյուրասիրություն, որը շատ թարմեցրեց և զվարճացրեց երեխաներին:
Կազմակերպությունը այս ձևով փորձելու է երեխաներին ծանոթացնել իրենց աշխատանքների հետ և, լավագույն օրինակ ծառայելով, կարող ուժերին ներգրավել կամավորական աշխատանքների մեջ` օգնելու մնացած երեխաներին: Այս գործունեությունը կարծես թե դարձել է գործնական ուղի, այն է` օգնելով նրանց չենք ակնկալում շնորհակալություն, այլև նրանց օգնությունը մնացած երեխաներին, որոնք ունեն մեզնից յուրաքանչյուրի կարիքը:
|
2008թ.-ի ապրիլի 28-ին հատուկ տիպի մանկատան պարապմունքներից մեկի ժամանակ կամավորներից Ալիսա Սարհատյանը, մասնագիտությունների շուրջ քննարկման սահմաններում, հրավիրել էր մրգեր ձևավորողի, որը դասի ժամանակ ցույց տվեց երեխաներին խնձորի, բանանի, նարնջի և այլ մրգերի կտրատման, ձևավորման ընթացքը: Մինչ ձևավորողը կտրատում էր մրգերը, երեխաները համակ ուշադրությամբ հետևում էին և միևնույն ժամանակ պատասխանում ուսուցչի հարցերին, թե որն ինչ միրգ է, ինչ գույն է, աճում է արդյոք Հայաստանում, թե ոչ...
Երեխաների համար սա մեծ անակնկալ էր, քանի որ նրանք երբևէ չէին տեսել միրգը չկտրած, ամբողջական վիճակում, ինչպես նկատեց դայակներից մեկը: Բանն այն է, որ խոհանոցում նրանց ամեն բան պատրաստի վիճակում են մատուցվում, նույնիսկ շատերը կեղևով ձու և կարտոֆիլ չեն տեսել: Իհարկե այս ամենը ցավալի է, բայց սա թող մեզ ուժ տա, որ շարունակենք մեր Աստվածահաճո աշխատանքը: Չէ որ նրանք են մեր ապագան...
|
| «Քոլգեյթ» ընկերության այցը հատուկ տիպի մանկատուն
|
Երեխաների հետ հաղորդակցման ևս մեկ եղանակ
|
Գոհունակությամբ հայտնում ենք, որ աստիճանաբար ավելի հաճախակի են դառնում տարբեր կազմակերպությունների այցերը «Ապագան բաց է» ՀԿ, ինչը ցուցանիշ է այն փաստի, որ մեծացել է հետաքրքրությունը ու հոգածությունը մանկատան, հատուկ տիպի դպրոցների և սոցիալապես անապահով երեխաների կրթության նկատմամբ:
Հերթական այցելությունը հատուկ տիպի մանկատուն կատարվել է «Քոլգեյթ» ընկերության Հայաստանյան ներկայացուցչի կողմից: Նրանք պատրաստել էին նվերներ երեխաների համար, ինչպես նաև անցկացրեցին ուսուցողական պարապմունք, որի ընթացքում բժիշկ Մարինեն երեխաներին մատչելի ձևով բացատրեց ատամի կառուցվածքը և այն անհրաժեշտ պարտադիր ամենօրյա միջոցառումները, որոնք անհրաժեշտ են ատամները առողջ պահպանելու համար: Երեխաները նկատելիորեն հետաքրքրված էին և մեծ ուշադրությամբ հետևում էին բժշկի խոսքին:
Մեծապես արժեքավոր են իրենց նշանակությամբ նմանատիպ ուսուցողական պարապմունքները, քանզի վաղ տարիքից երեխաների մոտ հիմնավոր և տպավորիչ բացատրության շնորհիվ կձևավորվի գիտակից վերաբերմունք այնպիսի կարևոր երևույթի նկատմամբ, ինչպիսին է ատամի խնամքը:
|
«Ապագան բաց է» կրթական հասարակական կազմակերպությունը սկսում է նոր նախագիծ: Այն իրենից ներկայացնում է նամակագրական կապ տարբեր մարդկանց (կամ կազմակերպությունների) և մանկատների, հատուկ տիպի դպրոցների և չքավոր երեխաների հետ: Ծրագրի պատասխանատուներն արդեն կատարում են նախապատրաստական աշխատանքներ սկզբնական տաս երեխաների մասով ծրագիրը մեկնարկելու համար: Նախատեսվում է նաև վեբկայքում ստեղծել այս նպատակի համար համապատասխան բաժին:
Կոչ ենք անում բոլորին ակտիվորեն մասնակցել այս ծրագրին և նամակագրական կապի մեջ լինել գոնե մեկ երեխայի հետ: Հուսով ենք, որ այս եղանակով կկարողանանք օգտակար լինել կարիքի մեջ գտնվող երեխաներին և մշտական նորությունների միջոցով, ավելի հետաքրքիր դարձնել նրանց կյանքը:
|
| Մարտի 8` տոն, որ հուզում է այս երեխաներին
|
Մարտի 7-ին մի շարք մանկատներում և հատուկ դպրոցներում կազմակերպվել էր կանանց տոնին նվիրված միջոցառումներ, որի ընթացքում երեխաները գովերգում ու գովաբանում էին մայր էակին: Ամեն անգամ մայր բառն արտասանելիս, նրանք հենց այնպես չէին արտաբերում, այլ ամբողջ էությամբ զգում ու ապրում էին այդ սուրբ բառը: Եվ արցունքներ էին անզուսպ թափվում նրանց աչքերից, իսկ ներկաները մի կերպ փորձում էին հանգստացնել նրանց փոթորկված սրտերը: Տեսարանը անչափ հուզիչ էր ու բառերով աննկարագրելի...
Առանց այն էլ տխուր են նրանց աչքերը, իսկ ժպիտն էլ հազվադեպ է զարդարում նրանց դեմքերը, ուրեմն մեր անձնական խնդիրն է անել ավելին աջակցելու համար այս երեխաներին:
Շնորհավորում ենք բոլոր մայրերի և աղջիկների տոնը և ցանկանում, որ յուրաքանչյուրը գիտակցի, որ մայր լինելը Աստծո պարգև է և պատասխանատու կոչում, իսկ նրանց, ում չի հաջողվում դա հասկանալ, մաղթում ենք, որ սթափվեն, քանի դեռ ուշ չէ և իրենք նույնպես զգան մայր լինելու բերկրանքը: Ինչպես նաև կոչ ենք անում բոլոր երեխաներին, որ ամեն անգամ «մա՜ամ, մամա» ձայնելիս չանեն դա լոկ սովորույթի ուժով, այլ փորձեն զգալ ու ապրել այդ սուրբ բառը...
|
| «Ես և շրջակա աշխարհը» -ի հյուրն է Դ. Ջամալյանը
|
Համագործակցության կոչ
|
Մարտի 4-ին #12 հատուկ դպրոցում «Ես և շրջակա աշխարհը» դասընթացի հյուրն էր հոգեբան Դավիթ Ջամալյանը: Վերջինս աշխատում է Երևանի Վ. Բրյուսովի անվան պետական լեզվաբանական համալսարանում: Հանդիպման ընթացքում նա երեխաներին ներկայացրեց հոգեբանություն առարկան և դրա դերը մեզնից յուրաքանչյուրի կյանքում: Հոգեբանությունը կոչված է գիտական հիմնավորմամբ լուծելու հետևյալ խնդիրը` կյանքում արդյունավետ գործունեություն ծավալելու համար մարդ պետք է ճանաչի ոչ միայն իր սեփական անձը, այլ նաև ուրիշների:
Բացի այդ, երեխաների հետ քննարկվեցին հարցեր հայրենիքի, նրա դերի, հայտնի հերոսների, հայրենասիրության և մեզնից յուրաքանչյուրի` հայրենիքի նկատմամբ պարտքի մասին:
Հանդիպման վերջում երեխաները շնորհակալություն հայտնեցին պարոն Ջամալյանին, նրա հետ կրկին հանդիպելու ակնկալիքով:
|
Հարգելի այցելու, 2005թ-ից ի վեր մեր կրթական հասարակական կազմակերպությունը իրականացնում է կրթական ծրագրեր մանկատներում և հատուկ դպրոցներում: Մեր հիմնական նպատակն է` օժանդակել սույն հաստատությունների երեխաներին` բարձրացնելով նրանց կրթական մակարդակը: Կարևորելով կրթությունը յուրաքանչյուր երեխայի կյանքում` փորձում ենք անել հնարավոր ամեն ինչ նրանց օգտակար լինելու համար: Մեր հասարակական կազմակերպությունը չունի ոչ մի հովանավոր, սակայն մեր թիմը բաղկացած է կամավորներից, որոնց խանդավառ նվիրվածության շնորհիվ կարողանում ենք իրականացնել մեր ծրագրերը:
Եթե Դուք ցանկություն ունեք համագործակցել մեզ հետ` իբրև անհատ կամ կազմակերպություն, խնդրում ենք կապ հաստատել մեզ հետ: Մենք պատրաստ ենք ձեզ հետ միասին օգնել երեխաներին: Նրանց կրթական կարիքները մեծ են և զանգվածային, հետևաբար մենք դեռ շատ գործ ունենք անելու և ունենք ձեր օգնության կարիքը:
|
