| Ձմեռ պապիկն այցելում է բոլորին 2009
|
|
|
| Ձմեռ պապիկն այցելում է բոլորին
|
Ուզու՞մ եք տեսնել մանկատան երեխաների ուրախությունը, երբ Ձմեռ Պապիկը այցելում է իրենց... |
Սիրելի բարեկամներ,
Մոտենում են Ամանորի և Սուրբ Ծննդյան տոները, երբ հավաքվում ենք միասին` հարազատների ու մտերիմների ջերմությամբ շրջապատված դիմավորելու Նոր տարին, երբ փոքրիկները սպասում են Ձմեռ պապիկի նվերներին...
Իսկ գիտե՞ք, որ կան մանուկներ, ում Ձմեռ պապիկը չի այցելում: Երեխաներ, ովքեր չգիտեն` ինչ է ընտանեկան ջերմությունը: Փոքրիկներ, ում համար Նոր տարին որևէ հրաշք չունի...
Ուզու՞մ եք օգնել` ամանորյա հեքիաթը իրականություն դարձնելու այս երեխաների համար: Ուզու՞մ եք զգալ, որ ինչ-որ տեղ կան երեխաներ, ում կյանքերում ամանորյա հրաշք է տեղի ունեցել` հենց ձեր շնորհիվ:
Դուք նույնպես կարող եք օգնել երեխաներին: Իսկ միասին ամեն ինչ կարող ենք:
Ավելի քան 5 տարի «Ապագան բաց է» կրթական հասարակական կազմակերպությունը (www.fio.am) կրթական ծրագրեր է իրականացնում մանկատների, հատուկ դպրոցների և կարիքավոր ընտանիքների երեխաների համար: Յուրաքանչյուր տարվա դեկտեմբերի վերջին շաբաթվա ընթացքում «Ձմեռ պապիկն այցելում է բոլորին» ակցիայի շրջանակներում մենք ամանորյա հյուրասիրություններ և այցելություններ ենք իրականացնում Երևանի ու մարզերի մանկատների, հատուկ դպրոցների և կարիքավոր ընտանիքների երեխաների համար:
Ինչպե՞ս կարող եք մասնակցել դուք.
- դրամական նվիրատվություն կատարել (ընդամենը 1,000 դրամով դուք կարող եք հոգալ մեկ երեխայի ամանորյա հյուրասիրության և նվերի ծախսերը)*
- օգնել մեզ երեխաների համար կազմակերպվող միջոցառումների ժամանակ
- տարածել այս ակցիայի մասին բարի լուրը
* Ինչպես և ամեն տարի, ամանորյա միջոցառումների հետ կապված աշխատանքները իրականացվելու են թափանցիկ և բոլոր աջակիցների համար հասանելի տարբերակով, իսկ աշխատանքների ավարտից հետո հաշվետվություն է տեղադրվելու մեր կայքում (www.fio.am):
Մասնակցելու և լրացուցիչ մանրամասների համար խնդրում ենք դեկտեմբերի 7-ից մինչև 25-ը դիմել`
|
«Ապագան բաց է» կրթական հասարակական կազմակերպություն
հասցե` Քաջազնունի 1, 3-րդ հարկ
հեռ.` +[374](10)55-91-26 (14:00-18:00)
կոնտակտային անձ` Սամվել Մովսիսյան +[374](77)62-66-43
էլ.փոստ` sam_movsisyan@yahoo.com
|
|
| Միասին ամեն ինչ կարող ենք
|
 |
Արդեն 5-րդ տարին անընդմեջ մենք` «Ապագան բաց է» կրթական ՀԿ-ի կամավորները, կյանքի ենք կոչում վտանգված երեխաներին կրթության միջոցով հավասար հնարավորություններ տալու տեսլականը:
Մենք վստահ ենք, որ մանկատների, հատուկ դպրոցների և կարիքավոր ընտանիքների երեխաները կարող են և պետք է ավելիին հասնեն, քան որևէ ցածր վարձատրվող փակուղային աշխատանքի դատապարտված լինելը: Այս ուսումնական տարին սկսելով սեպտեմբերի 3-ին կազմակերպված գունեղ միջոցառմանը մասնակցելով` մենք նոր եռանդով ու խանդավառությամբ
շարունակում ենք մանկատների, հատուկ դպրոցների ու կարիքավոր ընտանիքների երեխաների կրթության բարելավմանն ուղղված ծրագրերը: Դրանք պարզապես պարապմունքներ չեն. մենք ձգտում ենք մեր սերն ու հոգատարությունը փոխանցել երեխաներին, վստահություն սերմանել կրթության միջոցով ցանկացած բարձունքների հասնելու հնարավորության հանդեպ, և ուժ տալ նրանց` իրենց երազանքները իրականացնելու:
Դուք տեսե՞լ եք մանկատան երեխաների ուրախությունը, երբ հանդիպում են իրենց հարազատ կամավորներին: Ուզու՞մ եք զգալ նրանց անկեղծ հետաքրքրությունը, երբ ծանոթանում են նոր կամավորների հետ, ովքեր եկել են իրենց օգնելու: Դուք նույնպես կարող եք օգնել երեխաներին: Իսկ միասին ամեն ինչ կարող ենք:
|
| Այցելություն «Արևներ» երգչախմբի մենահամերգին
|
|
Սեպտեմբերի 3-ին Ապագան Բաց է կրթական ՀԿ-ի եռանդուն թիմի նվիրված աշխատանքի շնորհիվ կազմակերպվեց 2009-2010 ուս.-տարվա առաջին միջոցառումը: Կարիքի մեջ գտնվող երեխաները հնարավորություն ունեցան ներկա գտնվելու Armenian Music Fest-ի շրջանակներում կազմակերպված «Արևներ» մանկապատանեկան երգչախմբի մենահամերգին: Համերգի ընթացքում երեխաներն ակտիվորեն ձայնակցում էին բեմահարթակին ելույթ ունեցող փոքրիկ երգիչ/երգչուհիներին, ողջունում նրանց զվարթ կոչերով և անգամ զարդարում երաժշտական համարները յուրահատուկ խմբակային պարերով:
Մեծ, թե փոքր, նրանք բոլորը երջանիկ էին այդ մի քանի ժամվա ընթացքում, նրանք միասին, ձեռք-ձեռքի տված, օրորվում էին մանկական անհոգ երգերի մեղեդիների ներքո, ու նրանց աչքերի մեջ փայլում էր անկեղծ մանկական հրճվանքի փայլը:
Ետ դարձի ճանապարհին երեխաներն ունեցան փոքրիկ էքսկուրսիա երեկոյան Երևանով` կիսվելով տպավորություններով միմյանց, ինչպես նաև մեզ հետ:
Իսկ մենք` կամավորներս, որ մեր աշխատանքի ընթացքում ամեն կերպ ջանում ենք ուրախության անմոռանալի րոպեներ պարգևել այս երեխաներին, ուրախանում էինք ավելի շատ. մեր աշխատանքն այնքան ջերմ պահեր է նվիրում այս փոքրիկներին: Եվ երբ լսում ենք «ես երբեք չեմ մոռանա այս հրաշալի օրը» կամ «անչափ շնորհակալ ենք մեզ նման անմոռանալի երեկո պարգևելու համար» խոսքերը, անկախ հոգնածությունից, անկախ բարդ աշխատանքային օրերից և առօրյա կյանքի բազմաթիվ խնդիրներից, մեր սրտում ավելի պայծառ է վառվում մեր հասարակության կարիքի մեջ գտնվող երեխաներին աջակցելու, ուղղորդելու, նրանց ապագան բացելու ցանկությունը:
Ապագան Բաց է կրթական ՀԿ-ն պարբերաբար կազմակերպում է նմանատիպ միջոցառումներ` նպատակ ունենալով ավելի քաջալերելու երեխաներին, որպեսզի ավելի լավ սովորեն և կարողանան իրենց գիտելիքներով ու նպատակասլացությամբ հասնել հաջողությունների:
|
